Jahkečoahkkin

Jahkečoahkkimis lea mielahttuin stuorimus vejolašvuohta váikkuhit Sáminuora bargguide boahttevaš jagi. Earet čoahkkinráđđehallamii addo vejolašvuohta ovddidit ulbmiliid, evttohusaid ja cealkámušaid ovddas stivrrain.

Bures boahtin
Sáminuora jahkečoahkkimii

Dál lea fas áigi doallat Sáminuora jahkečoahkkima! Dán jagi leat bures boahtin Gávtsjávrái 7-9 b. miessemánus.
Miessemánnu lea mánnu go álddut njollot misiid. Dan gal soaittát juo diehtit. Muhto leat go jurdilan got don dan dieđát? Soaitá nu ahte lea áhkkut gii lea dan dutnje muitalan, dahje soaitá nu ahte leat ieš oaidnán go ruksesmiesážat giđđat illá gostet vázzit. Leat go don goassege jurdilan man olu don juo dieđát Sámi luonddu birra. Dahje man olu áhččát, áhkkut, dahje olbmát diehtá ja máhttá? Leago aktage dutnje muitalan man divrras dat du máhttu lea?

Mijjen eatneme
Dán jagi mii muittihit dutnje, nuorra sápmelažžii, man olu árvu du iežat eallinvuogis, jurdagiin ja máhtus lea. Min fádda dán jagi lea mijjen eatneme- min eanan, min ruoktu. Mii dáhpahuvvá go min eanan rievdá? Go dálkkit eai leat nu go lávejedje, ja go min eanan gáržo. Maid mii leat ovdal vásihan ja mii lea vuordimis boahtteáiggis? Maid dálkkádatrievdan mearkkaša davviguovllu olbmuide? Got galgá Sáminuorra bargat birasjearaldagaiguin? Bargobajiin mii beassat oahpastuvvat olbmuiguin geat barget iešguđetge ládje biras áššiiguin ja sámi árbevirolaš máhtuin.

Sohppar
Ii leat dušše báikenamma Ruohabeal davvisámis, muhto dološ sátni sámi čoahkkananbáikái ja soabadallamii. Dán jagi mii viggat rievdadit min čoahkkinvuogi. Ovdal leat mii čuovvolan oarjemáilmmi málliid, ja dahkan nu go sii leat sápmelažžii oahpahan ahte lea njuolga dahkat. Dál mii háliidit geahččalit bargat sámi vuogi mielde. Mii galgat ráđđehallat ja sohpparstallat. Dat mearkkaša ahte mii ságastallat ja soabadit. Sávvamis dát addá vel buoret vejolašvuođa dutnje mielláhttun váikkuhit Sáminuora doaimmaide! Norgga, Suoma ja Ruošša beale sáminuorat maid bovdejuvvojit čoahkkimii, ja nu beassat ge bargat rájiid rastá maid.
Dán jagi besset eanemusat 100 mielláhttu mielde čoahkkimii. Ilmmut nu johtilit go vejolaš ja sáddes sisa árvalusaid! Maŋemus beaivi ilmmuhit iežas ja árvalusaid buktit lea 27 b. cuoŋománus.
Ilmmuhanhaddi lea 100 ruvnnu mielláhttuide ja 500 ruvnnu čearuide ja servviide.
Dan haddái čuovvu mátki/ mátkkegolut nugo kansliijain soabada ja vel orohat ja biebmu. Vahkkuloahppa lea dieđusge alkohola haga!

Oaidnaleapmái!
Dearvvuođat
Jođiheaddjis Helena Ommas ja Sáminuora stivrras
Ilmmuhit iežat dagat Sáminuora kansliijai Anna- Mariai.
E-poastta: saminuorra@same.net
Tel: 0980-82147