Sámenuora lihttotjåhkanibmáj 2011

Buoris boahtem Sámenuora lihttotjåhkanibmáj

Mejt DÅN nuorra sábme sidá? Makkárin dån lulu sihtat ietjat boahtteájgev jus iesj besa mierredit? Makkárin galggá Sábme 2025? Le gus goassak duosstam ájádallat dan birra?

Muv niehko luluj náv: jagen 2025 gájkka nuorra sáme buoragit viedji, ietja bessi válljit ietjasa iellemlágev ja e dárbaha ballat bierggimis árbbedábálasj sáme äládusáj, máná gudi bajássjaddi 20-lågon bessi oahppat sámegielav hejman ja skåvlån, Sábme l guovllo gånnå goappátjagá árbbedábálasj ja ådåájggásasj äládusá åvddåni ja Svieriga stáhtaministar skuolkká Sáminuora åvddåulmutjij rádev gatjátjit gå ájggu märrádusájt válldet ma sáme nuorajda guosski.

Lev gus mejdik vajálduhttám? Lettjav dávk. Valla loahpe l niegadit, jus ep ietja diede mejt sihtap de sjaddá vájvve åvddånit. Gå miján la niehko de esski máhttep gäjnov gávnnat gåk dåhku ållet.

Dán jahkásasj temá l aktan åvddålijguovlluj.

Ájádus le mij sáme nuora galggap sjaddat pro-aktijvalattja. Pro-aktijvalasj mierkki mij ietja mierredip makkárin sihtap iehtjama boahtteájgev. Lep gallánam iehtjáda álggovidjurijt biedji mijá iellemij ja dåssju maŋŋel la miján máhttelisvuohta moalgget.

Ådå rádnajs, ulmutjijs ja álggoálmmugijs máhttep oahppat ja mielav oadtjot gåk mij sáme máhttep iehtjama sebrudagáv åvdedit. Danen lep dán jage bivddim värálda álggoálmmugij åvdåstiddjijt gulátjit sijá rahtjamij birra. Bessap aj gähttjalit ålles vájmujn lávllot, slow-dejtit ja diehtet What’s up Sámen…

Dán jage tjåhkanip Tjiehtele, Kittelfjällan 26-29 b. moarmesmánon!

Vuojnnalip!
Helena Omma, Sáminuora åvddåulmusj
ja Sámenuora stivras.

Diededa ietjat maŋemusát 6 b. moarmesmánon: info@saminuorra.org, Tele: 070-2488847

Gehtja aj mijá häjmmabielev: www.saminuorra.org
ja blåkkav: www.saminuorra.wordpress.com