Sáminuora birra

Sáminuorra l stuorámus nuorajorganisásjåvnnå sámenuorajda uddni. Mij gáhttidip sáme nuoraj ássjijt ja rievtesvuodajt. Dajna gå sámenuora nåv oabllát viessu guhka gaskaj, de mijá ájnnasamos bargojda gullu gávnadimsajijt dahkat. Mij hássap danen lägerijt ja moatteláhkáj doarjjop ja barggap aktan ietjá organisásjåvnåj gávnatjit máhttelisvuodajt sáme nuorajda iejvvidit. Mijá ulmme l sámenuora galggi nanos sáme identitehtav ja gullumav dåbddåt.

Sámegiella l mijá bargo guovddelin ja mij agev gähttjalip gäjnojt gávnnat vaj divna sajijn aneduvvá. Sáminuorra l vuodo Sáme nuorajda, gånnå miellodahteduvvi ja viehkev oadtju moattelágásj ássjijn ja vájvesvuodajn. Dajna gå moattelágásj sebrudakássjijt gáhttidip de sihtap jáhkkelis nuorajorganisásjåvnnån årrot, mij mierrediddjijt bájnná sáme nuoraj ássjijt buoredittjat. Sáminuora stivrra gähttjal kommuvnajt ja fábmudagájt bájnatjit ássjijn ma sáme nuorajda guosski. Mij barggap sáme iesjmierredime  åvdås, rievtesvuohta mij sámijda álggoálmmugin gullu.

Gähttjalip sámenuoraj vuojnojt moatteláhkáj vuojnedit, degu dal vuosstálasstemij ja tjállagij baktu. Sáminuorra aj barggá lasedittjat diedojt sámij vidjurij birra nuorajda svieriga sebrudagán.

Histårjjå

Sáminuorra l nuorajorganisásjåvnnå mij la gávnnum ienep gå 45 jage. Sáminuorra l histåvrålattjat politijkkárskåvllån doajmmam. Moattes Sámedikke álmmukválljim sebrulattjajs li Sáminuoran ietjasa politijkalasj bargov álgadam. Sáminuorra l jagij milta moatteláhkáj oasálasstám udnásj sáme sebrudagá tsieggimin. Organisásjåvnnå l måttij sierra prosjevtaj barggam ja aj sáme politijkav åvddålijguovlluj doalvvum. Álgadam lip degu dal vuostasj sáme nuorajavijsav, namájn Nuorat. Avijssa uddni l organisásjåvnås luovas ja ekonomalasj siebrren ietjas stivrajn la. 70-lågo rájes la aj svieriga girkkujn aktan barggam hásadittjat jahkásasj sáme skallosajev. Sáminuorra l aj ietjá sáme organisásjåvnåjt bájnatjam sebrulattjaj ja barggojuohkusij moatten stivrajn. Árrat Sáminuorra barggagådij Sámedikke nuorajráde åvdås ja uddni adná guokta sebrulattja danna.